föstudagur, desember 23, 2005

Gleðileg jól góðir hálsar og farsælt nýtt ár...

a presto

Giovanna

fimmtudagur, desember 22, 2005

Hvernig var þetta nú eiginlega í morgun? Já eiginlega svakalega skemmtilegur morgun. Enginn skóli hjá Gumma og ekkert stress. Sofa svolítið lengi og fá sér svo sterkt kaffi og ristað brauð með sítrónusultu og svo er farið að jólast svolítið. Skrapp svo seinni part dagsins í Kringluna með Gumma, Hildigunni og Ástu og það var allt á fullu þar. Við náðum þó að klára jólagjafir og vorum bara snögg að þessu. Við Gummi fórum svo í æðislegt jólaboð hjá Möggu Pálma, og hittum stóru strákana hennar, Hjalta og Maríus. Sungum jólasöngva með þessum líka góðu söngvurum, Maríusi og Páli Óskari og Seth og náttúrlega Möggu og stelpunum.og hlustuðum á Siggu Soffíu spilaði á flygilinn af snilld. Hún er algjör glæsipía, stelpan. Matthildur söng neðri rödd, dúllan. Svo þegar við komum heim urðum við aðeins að drífa jólatréð upp. Þetta er stærsta jólatré sem ég hef nokkurn tíma átt. Fengum áttræðan smið til að aðstoða okkur. Pápi gamli mætti með söng og sagaði ofan og neðan af . Tekur hálfa stofuna samt. Á morun þarf ég að kaupa aðra seríu á tréð. Og aðeins að gera fínt í kringum mig og kannski klára að pakka inn. Það væri nú næs.

a presto

Giovanna

miðvikudagur, desember 21, 2005

ekkert sérstakt að frétta annað en dagurinn byrjaði vel og endaði ágætlega, og ég voða mikið bara að hitta vinkonur á Jómfrúnni og plana dekurdaga í janúar og beint þaðan hitta Möggu Pálma,sem kynnti mig fyrir Marimekkóbðúinni þar sem við keyptum okkur dágóða hamingju, þótt ekki væri nema uppá finnskan tangó. Síðan kaffi í Iðu. Skroppið til Ástu sem er engill og æðisleg, enda á hún svo dásamlega foreldra sem eru alltaf í beinu sambandi við ömmu djó. Skrapp svo að halda uppá útskrift Kiddu rokk, frænku minnar, sem er núna trésmiður. Til hammara með daginn elsku frænka. Við settumst á Lækjarbrekku og gáfum okkur góðan tíma í að smjatta á dásamlegum réttum... Nú þaðan lá leiðin uppí útvarp. Komst að því að ég var örlítið of sein í jólakveðjurnar, þannig að nú er að hitta á nýárskveðjurnar maður lifandi. Var svo að úða í mig lemmon curdinu hans Sigga Snorra, því að það er það besta lemmon curd sem ég hef á ævinni smakkað.


a presto

Giovanna

þriðjudagur, desember 20, 2005

góðir hálsar, jólasmákökubakstri er þá lokið að sinni. Hann hófst hér a la via Rossa alle 18.30 og lauk nokkrum klukkutímum seinna. bakaðar voru sörur og verður að segjast hreint út að útkoman var gríðarlega góð, sérstaklega ef tillit tekið til útlists, miðað við hvernig sörurnar litu út í fyrra. Núna eru þær já bara nokkuð lögulegar, enda vorum við tvæar og sérlega myndarlegar og nákvæmar húsmæður að verki. Skal fyrsta telja Helgu Haraldsdóttur,Hróðmars konu Sigurbjörnssonar, sem var sett í öll nákvæmari verkin og undirritaða sem braut þá frekar eggin og kveikti á ofninum og stillti hrærivélina, ssem eru jú nákvæmisverk svona útaf fyrir sig. Við sjáum amk ekki framá að við þurfum að setja þessar sörur í neinar sérstakar lýtaaðgerðir. Og eftir þessar glæsilegu sörur sem vour unnar í þremur áföngum, þá skellum við í svokallaðar öræfakökur en nafnið hljóta þær út af lögun sinni, líkjast Drangaskörðum, Helkutindum sumar að vísu svona bara einsog Öskjuhlíðin en þessar kökur gætu gert sig í eftirréttum blandaðar með ávöxtum og rjóma, nú ellegar með ís.

en nú er maður komin á hálan og betra að kveðja.

a presto

Giovanna

föstudagur, desember 16, 2005

Jæja,

ég missti eiginlega af afmælinu hennar Önnu Axels en sem betur fer ekki alveg. Hitti síðustu manneskjurnar og náði að smakka á öllum sortum og skoða ljóðin og lausavísurnar sem ortar höfðu verið af þessu tilefni. En gaman. Til hamingju með afmælið í gær Anna mín. Var með drengina á Grund og þeir sungu einsog englar. Það var sérstaklega gaman og dásamlega afslappaður og fallegur söngur hjá þeim. Gísli Magna spilaði undir og var magnaður. Svo voru Stúlknurnar mínar að syngja líka. Þær sungu vel, þótt þær hafi verið smástund í gang í upphituninni um daginn. Þær eru orðnar svolítið þreyttar á jólastressinu þessar elskur. En það sem þær eru búnar að vera duglegar að syngja. Annars allt í fjöri og nú er það julefrokost hjá Nýja söngskólanum sem bíður.

Og að lokum;
Your results:
You are Superman
Superman
80%
Spider-Man
80%
Wonder Woman
80%
Green Lantern
80%
Iron Man
80%
The Flash
75%
Robin
70%
Hulk
60%
Supergirl
60%
Catwoman
40%
Batman
0%
You are mild-mannered, good,
strong and you love to help others.
Click here to take the "Which Superhero are you?" quiz...


A presto

Giovanna

miðvikudagur, desember 14, 2005

Jæja,
nú er aðeins að róast í jólasöngnum og þá er hægt að fara að jólast eitthvað. Ég á bara eftir að æfa með Kór Bústaðakirkju fyrir jólasöngvana,og syngja á jólatónleikum Tónskóla Þjóðkirkjunnar, láta lillurnar syngja á jólafundi og drengina fyrir elliheimilið Grund og svo er það götumessan með léttunum. Já og svo eru það jólakvöldgestirnir hjá Jónasi, við Ragnheiður Gröndal og Léttsveitin í smækkaðri mynd tókum upp músíkina í gær og viðtalið verður seinna. Ég meina þetta tekur enda. Mesta stressið búið amk. Þá er að klára að búa til jólin. Kaupa gjafir fyrir börnin og gera jólalegt. Á ég að fara að baka eitthvað? Þyrfti að fá Helgu Har í Sörugerð og athuga hvort þær verði fallegri í ár en síðasta. Búin reyndar í laufabrauði með múttu og HIldigunni,Gumma Skúla og pabba sem var æðislega skemmtilegt. Svo verð ég að baka kardemommubrauð eftir eldgamalli danskri uppskrift, þar sem eru notuð egg og mjólk og sykur auk kardemommu, hveitis og gers. Svo er bara að finna balansinn á milli. Það er svo mikilvægt að hafa réttan balans.. Hæ-uuu.

A presto

Giovanna Valgardi

sunnudagur, desember 11, 2005

Sjö hlutir sem ég ætla að gera áður en ég dey
1.búa eitt ár á Ítalíu
2.gera fleiri cd-a
3.semja mín eigin lög
4.halda klassíska tónleika
5.fara til Ameríku
6.fara til Afríku
7.fara til Ástralíu

Sjö hlutir sem ég get gert

1.sungið altinn
2.leikið mér í eldkhúsinu
3.talað alltof hátt
4.sofnað á mitt græna
5.grenjað úr hlátri
6.borðað góðan mat
7.það er alltaf verið að stjórna kórum

Sjö hlutir sem ég get alls ekki gert

1.munað hvar ég setti gleraugun
2.eða lyklana
3.raðað nótum
4.hlaupið lengur en í tíu mínútur
5.náð mér í mann
6.haldið út heilsuátaki
7.opnað bílskúrshurðina


Sjö frægir sem heilla

1.Bryn Terfel
2.Antony Hopkins
3.Judy Dench
4.Celcelia Bartoli
5.Kristinn Sigmundsson
6.Hans Hotter
7.Glenn Gould


Sjö hlutir sem heilla mig við aðrar manneskjur

1.Bros
2.Húmor
3.Hlátur
4.Persónuleiki
5.Hógværð
6.Röddin
7.Músíkalitet

Sjö setningar sem ég nota mikið

1.Veriði róleg
2.Þögn
3.horfiði á mig
4.ha? hvað sagðirðu
5.sjaka sjaka
6.hvar eru gleraugun mín
7.Jibbíkóla

Sjö hlutir sem ég sé

1.Gumma
2.borð
3.sjónvarpið
4.kerti
5.Esjuna
6.jólaljós
7.fartölvuna

Sjö manneskjur sem ég ætla að klukka

1.þig
2.Hrafnkel
3.Gumma
4.Syngibjörgu
5.Vésí
6.Ingib.Marg.
7.Sillu

föstudagur, desember 09, 2005

Ég verð ekki söm eftir gærkveldið. Haldiði að ég hafi ekki bara setið beint fyrir framan Bryn Terfel á tónleikunum í gær. Á fjórðabekk númer 15. Það var einsog að vera á einkatónleikum.Enginn fyrir framan mig. Hann söng öll lögin bara beint til mín, og svona lög sem maður er búin að vera að syngja og láta aðra syngja í gegnum tíðina. Oh... Danny Boy, Shenandoh svo var Granada og og úr Carmen. Torreador regarde... ji minn. Ef maður var ekki Carmen í gær hver var maður þá.Hvílík augu og þvílík RÖDD. Og svo heilsaði ég meiraðsegja uppá manninn. Ég ætla sko ekki að þvo mér í dag..Not.

A presto

Giovanna

þriðjudagur, desember 06, 2005

Góðir hálsar, minn svolítið hás og slæmur í morgun, vonandi lagast hann hratt! Jóladívurnar og diskurinn, styrktartónleikar og Kór Bústaðakirkju. Verkefnin framundan og ég bara í slökun. Upp með sokkana og áfram með smjerið. Ótrúlegar fréttir berast frá Kúbu. Ákkúrat sömu daga og Léttsveitin ætlar þangað, er alþjóðleg kóramót í Havana. Við hreinlega göngum beint inní þá dagskrá alla,sem er afar glæsileg. Nú hefði Svanhvít vinkona mín sagt, þá gripu örlögin í taumana.

A presto Viva la Kuba!


Giovanna.

mánudagur, desember 05, 2005

Góðir hálsar, skrapp aðeins í Smáralindina í gær og festi kaup á úlpu handa drengnum sem er búinn að vera úlpulaus hálfan veturinn. Dásamleg frammistaða móður. Hildigunnur og Ásta voru með mér. Fórum svo einn hring í Sóstrene Grene eða Gröne eða hvað þær nú heita og forðuðum við okkur út úr þessari verslunarlind. Hvað á að kaupa annars fyrir jólin? Á maður bara ekki að stræka á þetta verslunarkjaftæði. Ég hét því amk. í morgun að halda framvegis sunnudaginn verslunarfrían. Annað hvort á maður að fara í kirkju, göngutúr eða vera heima og kveikja á kerti. Sisisi. Og nú er það amma djó sem nöldrar í skammdeginu, nei, ég meina, raular í rökkrinu. Næsta platan mín á að heita Amma raular í rökkrinu.

a presto


Nonna Gio

ps. Það er verið að klukka mig í hinum ýmsu bloggleikjum. Ég svara þegar að jólatónleikum ársins er lokið...

sunnudagur, desember 04, 2005

Jæja góðir hálsar, nú er maður bara hálftómur eftir tónleika gærdagsins. En svo er guði fyrir að þakka að það eru tónleikar eftir þennan tónleikadag. Ég var ósköp ánægð með Létturnar mínar. Fannst þær syngja hreinna og mýkra en oft áður. Svo fannst mér voða gaman að hafa Ragnheiði Gröndal og Hauk bróður hennar og þennan yndislega Eyjólf saxófónleikara. Gaf okkur annan blæ. Nú er að finna eitthvað rosalega skemmtilegt til að æfa fyrir stóra Kúbuvorið. Við fórum á Kringlukránna eftir tónleikana og jólasnjór var orðin jólabjór þarna seinna um kvöldið. Héldum aukatónleika fyrir írskan fyrirlesara sem mér skildist að hefði verið hér á landi í einn sólarhring til að halda fyrirlestur hjá Háskólanum í Reykjavík. Hann átti ekki til aukatekið orð yfir írsku stemningunni á barnum. Svo færðum við okkur nokkrar á Vínbarinn og þar voru léttur. En ég var ósköp fegin að koma heim á Via Rossa og Gummi sem var hjá afa og ömmu í nótt kom svo eldsnemma að ná í saxófóninn sinn . Hann var að fara í messuna og fann hvergi nóturnar sínar og ekki ég heldur. Skrýtið hvernig hlutir geta gufað upp rétt sisvona. Jæja en. Nú er að setja sig í dívugírinn og fara að undirbúa þau lög. Tvennir tónleikar á laugardaginn með þeim í Laugardagshöllinni góðan dag. Mér fannst bara fínt að troðfylla Langholtskirkju tvisvar. Og ég held það sé uppselt á tónleika Kórs Bústaðakirkju á sunnudagskvöldið næsta. Þar verður Diddú sérstakur gestur. Stundum skil ég ekki hvaðan allir þessir tónleikagestir koma.

Jæja ble ble og nú er að setja sig í lága drifið og reyna að hvíla sig líka fyrir næstu átök

a presto

Giovanna

miðvikudagur, nóvember 30, 2005

Jæja og aðventan byrjuð með Fögur er foldin og yfirröddum og hreint útsagt yndisleg stund í Bústaðakirkju á sunnudaginn. Krakkarnir mínir voru gjörsamlega að standa sig. Jibbíkóla Ég byrjuð að skreyta húsið, og baka rúgbrauð, sem heppaðist vel og bjó til skrýtna kæfu sem var skemmtileg tilraun og heppaðist svona næstum því held ég.Amk. mýkri en þessi sem ég gerði í fyrra eða var það árið áður? Æðislega góðar súrsuðu rófurnar maður. Sisisi. Fór á Jómfrúnna í dag og hitti gamlar og góðar vinkonur fer aftur á morgun og lokaæfingin komin í dag. Nei, smáaukadæmi á morgun. En allt að koma og bara gaman þegar þetta er að verða til. Uppselt á fyrri tónleikana. Sumsé gott...

a presto


Giovanna.

miðvikudagur, nóvember 23, 2005

Djísös hvað það er komið mikið myrkur. Myrkrið í kringum mig. En fór í morgun í Hreyfingu, dauðþreytt, ætlaði aldrei að koma mér í svefninn í gærkveldinu. Drollið á manni alveg gasalegt. Var eitthvað að reyna að klára þessa efnisskrá þegar ég kom heim eftir kóræfinguna í gær. Annars er allt að skríða saman sem betur fer. Hlutirnir hafa tendens til að bjargast. Fór svo sumsé í Hreyfinguna í morgun og þar var einhvurs konar pallaleikfimi, ægilega flínk stelpa að kenna manni sem þaut upp og niður pallinn kross og snúa og og og svona alveg einsog spýtukelling með engar mjaðmir. En voða flink og gasalega há og hröð tónlist. En Guð hvað ég sakna Kramhússins og mýktarinnar og sveiflunnar sem er þar í kennslunni.

a presto Giovanna

föstudagur, nóvember 18, 2005

Ég er orðlaus eftir þátt með Jóa Fel í gær. Hvurs konar er þetta eiginlega að kenna manni að opna dósir. Sussususs. Annars bara kúl sko, fór í ræktina í morgun og er á fullu í jólatónleikaundirbúningi... fæ svo allt liðið í kvellan í idol og Ástufjör.. Ásta er mesat krúttið. Jæja ég ætla að sópa ruslinu undir teppið.

A presto

Nonna Giovanna

fimmtudagur, nóvember 17, 2005

Ó já dreif mig loksins í morgun í Hreyfingu og skemmti mér konunglega í boltatíma einhverjum. Sviti og dans. Nú skal sett í gírinn fyrir Kúbuæfintýrið.

A prestissimo

Giovanna

miðvikudagur, nóvember 16, 2005

það er komið að því. ég verð að hringja í hreyfingu í dag. athuga hvort það eru einhverjir spennandi tímar sem er boðið uppá. koma mér af stað. búin að vera í letikasti í örugglega tvær vikur. hætt að fara í gönguferðirnar mínar í elliðárdalnum afþví það er svo sleipt. iii allltsaa. gengur ekki lengur.rosalega erfitt að koma sér af stað á svona dögum sem maður vill helst fara aftur uppí rúm undir sæng. með góða bók og mozart á fóninum.

a presto
Giovanna

mánudagur, nóvember 14, 2005

Guði sé lof að helgin er afstaðin. Byrjaði á miklu saltfiskboði á fös þar sem ég prufukeyrði réttinn "með kúbönskum ilmi". Og verður að segjast að þetta er ein besta uppskrift sem ég hef samið, enda var hún samin í afslöppun í flugvél á leið frá Ítalíu með fallegum hugsunum um Kúbu og átti að mæta í bók við lendingu. Nema hvað að ég hef reynt að bjóða stjórnarkonum í Léttsveit öðru hvoru í saltfisk hjá mér og núna var núverandi og fyrrverandi stjórn mætt ásamt sérlegum aðstoðarkonum mínum úr sveitinni. Helst hefði ég viljað hafa þær allar, en ég reyni að takmarka mig við 14 , það komast ekki fleiri við matarborðið. Á laugardaginn var síðan dekur og djamm og skemmti ég mér alveg konunglega. Ekki síst við að dansa við kramhússveiflu HAFDÍSAR. Það sem hún er frábær alltaf. Nú nú, svo lá leiðin í afmælisveislu hjá Gumma Finns, orðinn fimmtugur drengurinn og þar var drengjakórinn að troða upp. Þessar elskur. Ég hætti við að hitta Létturnar sem voru komnar uppí Skrúð þarna um kveldið, enda var Gummi einn heima og ekki til í að fara til ömmu og afa síns.Ég var rosalega fegin að koma heim til mín og leggjast í sófann og sjónvarpsgláp. Í gær var síðan dásamlegur sunnudagur og ég prufukeyrði nautið með krökkunum og afa og ömmu, í gúllassúpu sem var hreinlega ótrúlega góð. Lofar góðu og nú er ég byrjuð að viða að mér nautakjetsuppskriftum..

a presto

Giovanna matargat...

fimmtudagur, nóvember 10, 2005

Búin að fara í onduleringu og í reikningana að borga upp skuldirnar.. Auðvitað tekst það. Ég á alltaf nóg af peningum og alltaf jafn ánægð með að geta borgað skuldirnar. Nú er að skella sér í næsta verkefni og svo er bara talið niður í sjálfan Eymund nautabana.

A presto

Giovanna

miðvikudagur, nóvember 09, 2005

Letidagur, með saltfisk í bleyti

Lífið er saltfiskur

a presto

Giovanna

þriðjudagur, nóvember 08, 2005

þar kom að stresskasti dauðans, hvar er nótnabókin hans Gumma.?morguninn fór í að leita útum allt. morgunmaturinn og blaðalesturinn, sú gæðastund, algjörlega í maski. fékk danskan málara í heimsókn í gær og eldhúsið ilmaði svolítið af camus og vindlum og æfingaskema barnsins fór alveg í mask. hér var nú ekki verið að æfa nein resetativ eða messur af neinu tagi. bara hlusta á góðar sögur og hlægja svolítið. já bæ the vei, ég á von á hálfu nauti hér í eftirmiðdaginn. kannski að saltfiskveislur breytist í nautat! hvert stefni ég, mamma mia, slankekurinn fýkur og allar góðar heislufréttir tilheyra fortíðinni.

a presto

Giovanna

mánudagur, nóvember 07, 2005

nei nei, ekkert sérstakt nema bara vöknuð og búin með fyrstu morgunverkin (koma drengnum í skólann) og á leiðinni á Skerplugötuna til að hitta stelpurnar á stöðinni. á að taka upp einhvern skets með kóratriði. Annars er ég genginn í klúbbinn kaupum ekki í dag.klúbbur sem elísabet brekkan fjölniskona var í. byrjaði mjög vel því sonja vinkona kom færandi hendi í gær með marga poka af fötum á drenginn minn. hann var ekkert smá ánægður. ég er farin að fíla mig einsog ömmu mu. bara að endurnýta dótið. rosa kaupauki mar...

a presto
giovanna

sunnudagur, nóvember 06, 2005

Jibbíkóla, mér tókst að tína klukkutíma í morgun. Fór með Gumma sax í spilerí í kirkjunni í morgun og hélt alveg heiðarlega að klukkan væri tíu en góðir hálsar, hún var þá ellefu. Það er þó ekki meira stress í gang en að maður getur enn gleymt sé..Ikke?
Annars þægilega róleg helgi, stresslaus og spurning hvort maður endi bara ekki á einu góðu matarboði í kvöld. Maður reynir þá amk. að taka mesta draslið í burtu. Sópa því undir sófa og setja nóturnar í bunka..

a presto

Amma djó

laugardagur, nóvember 05, 2005

Lúxus að þurfa ekki að vakna fyrr en níu góðir hálsar . Munar svona svakalega um þennan eina og hálfa tíma. Hann Gummi er náttúlega í vetrarfríi þessa viku. Nema hvað, þegar ég vakna á morgnana eru fastir liðir að tékka aðeins á röddinni. Er hún þarna ennþá? Og viti menn, þarna var hún blessunin í gær ósköp hás og þreytuleg amk. í fyrsta tékki, svo ég fékk mér góðan slurk af sterku og góðu kaffi áður en ég hélt út í söngtíma til hans Jóns Þorsteinssonar, en þaðan kom ég gjörsamlega ný manneskja allt hæsi á bak og burt og Exurientes hans Bachs á heilanum. Ég dreif mig heim í kotið og ætlaði eiginlega að vera ótrúlega dugleg að gera voða mikið. Þrífa og bóna og pússa, en komst svo að þeirri frábæru niðurstöðu að ruslið hleypur ekki frá manni og sá að ef ég myndi ekki nota þennan dag til þess að hvíla mig og tjilla svolítíð með Gumma þá væri ég komin í stresskast dauðans. Settist svo við þennan líka yndislega flygill hennar Steinku og gleymdi mér til tvö. En þá var líka komið að því að fara með Gumma og kaupa föndurdót og fara með hannn í spilatíma og svona og til að gera langa sögu stutta þá endaði þessi dagur á heimalöguðum karamellum og idolglápi og arineldi. Nei ég sagði ekki rauðvínsglasi og kertaljósi. Vaknaði svo aftur bara klukkan níu og tiltölulega tilbúin til að hitta strákana, drengjakórinn minn blessaðan. Sungum svo nokkur skemmtileg lög og ákváðum að skella okkur í ferðalag í vor. Er það ekki tilvalið að hafa smá gulrót, svo amk. strákarnir mæti aðeins betur..

a presto

Giovanna

miðvikudagur, nóvember 02, 2005

Brauðið sem er að hefast...góðir hálsar er sisvona

2 1/2 dl ab mjólk
2 1/2 dl sjóðandi vatn
einn poki þurrger
tsk salt
slatti ólívuolía
4 kardimommur
haframjöl
kókosmjöl
hveiti
2 lúkur af ýmsum fræum, hörfræ..sesam,og eitthvað svona...

annars allt í fínu og flygillinn flotti sem ég mun geyma í tvö ár er nýstilltur og ku vera frá 1912 og fyrsti flygillinn hennar Þórunnar Askenasí og ég legg ekki meira á ykkur í dag

a presto
Giovanna

mánudagur, október 31, 2005

Og hvar voru svo gleraugun, góðir hálsar?

Í gærkveldi eftir erfiða helgi kveikti ég á þessari líka frábæru gufu og við Gummi ákváðum að taka eitt gufubað fyrir svefninn. Ég meina búin að vera löng helgi, messugiggin tvö með alla kórana, síðan síðasti yfirlestur yfir coverið á og að lokum la grande familia í sunnudagsmatnum, þannig að gufan var þá þetta eina sem var hægt að enda þennan dag á og hvað sé ég.. .Gleraugun lágu þar og biðu eftir að ég myndi sjá þau... Gummi var reyndar á undan, enda ég búin að lifa hálfu lífi síðan síðasta gufa var tekin. Almáttugur... maður er gjörsamlega orðin sjónlaus og ekki batnar það ef heyrnin er að fara líka...


a presto

Giovanna

sunnudagur, október 30, 2005

Góðan daginn góðir hálsar, bara vöknuð snemma, því upp er runninn messudagurinn mikli. Tvær messur í dag með börn og unglinga af öllum stærðum og gerðum. Svo er hún Sadolin danska með námsskeið í næsta húsi F.Í.H. Ég reyndi aðeins í gær að kíkja á hana, náði Páli Óskari sem sjarmeraði alla í kringum sig, en þurfti svo að hverfa af vettvangi til að æfa með Signýju og Bjarna útaf sætu fimmtugsafmælisgiggi hjá henni Elsu skíðadrottningu. Þetta var heljarinnar kvennaboð, hálft Þjóðleikhúsið mætt, sýndist mér. Enduðum svo kvöldið á Einari Ben í æðislega gómsætum saltfiskrétti. Já svo eru það loka loka loka handtökin á Léttsveitardiskinum í dag..Þetta tekur allt sinn tíma.Spennandi að sjá hvernig þetta endar...

a presto

Giovanna

föstudagur, október 28, 2005

og bara byrjað að snjóa góðir hálsar!

Sem er reyndar ágætt þegar að maður er önnum kafinn við að finna jólalögin fyrir kórana sína. Það styttist skuggalega mikið í fyrsta aðventukvöldið. Og sei sei. Nema hvað að tilboðin streyma til manns þessa síðustu og bestu daga, eftir að kvikmyndin kórinn er svona gjörsamlega búinn að slá í gegn. Ég fékk tilboð um daginn um að verða kokkur á síldarbát sem gerir út frá Fáskrúðsfirði. Sem mér leist náttúrlega alveg ótrúlega vel á..ég meina tilhugsunin um að kokka ofaní 14 hungraða karlmenn hreinlega ótrúlega spennandi. Svo var ég ekkert að hugsa neitt meira um þetta tilboð þegar hringt var í gær og aftur í dag...Ég er náttúrlega algjör hálfviti að segja nei.. ég var eitthvað stressuð á að æla í pottana en nú dauðsé ég eftir þessu. En hver veit nema að maður taki næsta tilboði...


a presto Giovanna

miðvikudagur, október 26, 2005

hæ hálsar mínar,

er að leggjast í rúmið hreinlega með dúndrandi höfuðverk og kuldahroll og vesen. Var það kannski stutta pilsið á útifundinum á mánudag sem gerði útslagið. Einsog ég var eitthvað lekker...

leggst í rúmið með bók og hot tea

Upp upp mín sál og allt með geð

a presto

Giovanna

sunnudagur, október 23, 2005

jæja góðir hálsar og hálsakot. Hér sit ég nú með nýja fartölvu og er að reyna að læra á hana. Svolítið lengi að læra ég, en það verður bara að hafa það. Þessi dagur er annars búinn að vera góður. Vaknaði eldsnemma til að hlusta á nýja cd-inn sem Léttsveitin er að fara að gefa út og skældi svolítið oní kaffibollann af því mér fannst þetta allt svo yndislegt svona í morgunsárið. Svo gekk ég upp í Elliðárdalinn með Guggu Sigurjóns á meðan Gummi fór í morgunmessuna. Settist svo í kaffi með Guggu og við hlustuðum á diskinn. Svo komu ma og pa og gu og við hlustuðum enn á diskinn. Þá fór ég sjálf í messusöng uppí kirkju og að því loknu var fundur hér heima og í þriðja eða fjórða sinn hlustaði ég á diskinn og alltaf jafn gaman hjá mér. Og sennilega er hann bara tilbúinn núna... jibbíkóla... Nema hvað að Bogi,Linda, Óli, Stebbi og Kjartan komu hingað í sunnudagslærið ásamt Hildigunni, Skúla og Ástu og áttum við yndislega stund. E la vita a via Rossa sempre bella.

a presto
Giovanna

miðvikudagur, október 19, 2005

Mio dio, góðan daginn hálsar mínir! Ég vaknaði náttúrlega fyrir allar aldir í dag, sem og aðra virka daga til að hræra minn hafragraut og hita. Við Gummi erum nefnilega búin að setja reglugerð fyrir Via Rossa 42. Já nú er það grautur á morgnana og vatn á milli og ávextir og fara að sofa klukkan tíu á kvöldin ( sem hefur nú ekki tekist enn) og fara að hlaupa á morgnana( sem hefur heldur ekki tekist ennþá..) Þessar reglur settir Gummi eftir að hafa horft á Þú ert það sem þú borðar á stöð2 á mánudagskveldið. Ég fór reyndar upp í dal í morgun og var hálf slöpp eitthvað og skrýtin og var að hugsa hvort það væri einhver tunglsýki, þegar ég fattaði að ég hafði bara gleymt að fá mér kaffifixið mitt í morgun. Snarlagaðist svo eftir að ég kom heim og hitaði kaffið.

a presto

Giovanna

mánudagur, október 17, 2005

Hæ, góðir Fremri-hálsar og aðrir hálsar...
Ég er náttúrlega svo fruntalega léleg í ættfræði að ég mundi ekki hvaða háls þetta var í Kjósinni.. Nema hvað. Líður ótrúlega vel og er bara nokkuð óþreytt, eftir æfingabúðahelgi að Skógum, þótt ég hafi geispað svolítið oft í gærkveldi. Ég var svolítið að monta mig með hina nýju tækni ættaða frá Tónskóla Þjóðkirkjunnar, en þar hef ég hafið nám í kórstjórn og hafiði það; enda ekki seinna að vænna eftir öll þessi ár sem kórstjóri... Og ekki einungis fæ ég tíma í að stjórna heldur er hinn skemmtilegi og frábæri Jón Þorsteinsson að taka minn söng í gegn. Og ég sem er nýgengin í söngkennarafélagið, fís, en ætti náttúrulega frekar að fara í nemendafélagið. En málið er að það er svo gaman að setjast aftur á skólabekk að mér líður einsog nýslegnum túskildingi þessa dagana. Og svona. Annars er hið eina sanna ömmulíf að byrja núna, blogga á meðan ég bíð eftir að fá að passa Ástu, því mamma hennar er á leið í söngtíma. Fékk að passa hana í einn og hálfan tíma í gær, hún var einsog hugur manns. Brosti bara og svaf þess á milli.Algjört krútt.

a presto

Giovanna

fimmtudagur, október 13, 2005

Halló hálsar góðir, neðri sem efri...

Ég var klukkuð í bloggleik... Beðin um fimm staðreyndir um mig sjálfa..Jeddúddamía!

1.Ég á ættir að rekja til Neðri-Háls í Kjósinn...

2.Á Gumma 10 ára sem á sig sjálfur og æfir sig í þessum orðum skrifuðum grimmt á saxann sinn.

3. Á líka sæta stelpu sem heitir Hildigunnur rósamunnur 22 ára. Hún er frábær söngkona og einsog allir góðir söngvarar góður kokkur og eldaði áðan fyrir mig og Gumma og Skúla og Ástu þessa líka frábæru ungversku gúllassúpu.. Nammi namm.

4. Á líka hann Skúla eða amk smá í honum. Hann er Tengdasonur Íslands..

5. Á líka Ástu sem er best best og sætust og brosti og hló til mín í dag...

6. Er ég búin? og ekki byrjuð að tala um alla kórana og börnin og blómin og matinn.

klukka Vésí, Sillu,Ingibjörgu Gunnlaugs og Grettis og Sigrúnu...

a presto

Giovanna
Góðir hálsar góðan dag!

Og bara allt að koma, lífið heldur áfram og maður tekur haustið í sátt. Öll vinnan einhvern veginn skemmtilegri en oft áður. Kannski er maður bara afslappaðri en áður. Eða eldri og reyndari. Amk. Reyndari. Mér finnst alltaf ég vera að yngjast.. Sumir myndu kalla þetta að vera ekki í sambandi við sjálfa sig... Bullið í manni, En. veit amk að hlutirnir hafa tendens til að bjargast.

Fór svo á æfingu í gær á Halldóri í Hollywood. Vonandi ber stjórnendum gæfa til að stytta leikinn aðeins, svo hann verði hnitmiðaðri... Frumsýning náttúrlega ekki fyrr en á morgun.

Æfingabúðir hjá hinni frægu Léttsveit um helgina. Get eiginlega ekki beðið eftir þeirri helgi, jafnvel þótt ég púli frá föstudegi til laugardagskvelds. Mikil gæfa að vera hætt að taka sunnudagsæfingarnar... Bara að vakna þann dag og koma sér í bæinn. Förum þetta árið austur að Skógum. Jeg lever et farligt og spændende liv! Ikke?

a presto tutti frutti

Giovanna

miðvikudagur, október 12, 2005

Góðir hálsar, góðan dag.

Og bara vel. Lifnaði heldur betur við eftir frumsýningu á myndinni Kórinn í gær. Ég óska Silju Hauksdóttur til hamingju með afkvæmið. Ótrúlega sætt og bara nokkuð eðlilegt allt saman. Ji...minn. Og ekki nóg með það. La via Rossa blessuð í bak og fyrir. Búið að skíra Ástu bestu og hægt að skoða myndir á blogginu hennar.

A PRESTO TUTTI FRUTTI

GIOVANNA

þriðjudagur, október 04, 2005

Góðan dag góðir hálsar....








föstudagur, september 23, 2005

Góðan daginn góðir hálsar,


Minn háls rétt að ná sér eftir kvefpest háustins. Haustið skellur harkalega á að þessu sinni, en maður tekur því bara. Já,já. Lætur sig hafa það bara. Skreppur upp í dalinn sinn og áður en maður veit er litadýrðin búin að heilla mann upp úr gönguskónum og svo er bara ósköp gott að horfa á Esjuna skarta snjóhvítu.
Börnin búa sig til brottfarar af via Rossa og uppá via Riso numero 10. Við Gummi böðum okkur í fermetrum. Ótrúlegt hvað þessir mánuðir fljúga frá manni. En uppvaskið bíður. Það hleypur ekki frá manni.

E la vita cosí, sempre una grande surpresa

a presto

Giovanna

laugardagur, september 10, 2005

Tja hérna, góðir hálsar, fer nú ekki oft út að borða, en í gærkveldi skruppum við nokkrir vinir í Perluna.... Nú,nú og æðislega spennandi matseðill og vínin flott eftir því. Forréttur, dádýr (mjög dýr) og aðalréttur önd og creme brule í eftirrétt. Æðislega lekkert og flott fram borið og gaman og fjör hjá okkur, en vantaði galdurinn í matreiðsluna, eina sem var eitthvað ÆÐISLEGT var eftirrétturinn. Ég sumsé sting ekki aftur uppá Perlunni.

a presto

Giovanna

fimmtudagur, september 08, 2005

Fullt hús hér í Rauðagerðinu þessa helgina, góðir hálsar. Ísafjörður mættur á svæðið. Yndislegt að hafa þrjár hæðir. Mæli með Via Rossa. Var í enn einu fimmtugsafmælinu í gær. Þóra Fríða Sæm hélt uppá sitt með glæsibrag. Söngur og gleði.

A presto

Giovanna

mánudagur, september 05, 2005

Jæja góðir hálsar, tíminn líður og nú byrjar innritun í barna-og unglingakórana í Bústaðakirkju. Ég er búin að þjóta í alla skólana og kynna starfsemina. Bíð spennt eftir að einhver innriti sig. Helgin róleg og yfirveguð. Ravel á föstudagskvöldið, vinkonukaffi Slankedoktoren i Danmark. Iiiiiiiii altså. Vil svo var við Broken Flowers... í Regnboganum, nema að þið hafið yndi af því að komast ekki að niðurstöðu.

a presto
Giovanna

föstudagur, september 02, 2005

Mig langar til að deila með ykkur súpunni sem ég eldaði í gær góðir hálsar.

Ég setti pott á gasið og ólívuolíu í botninn.Opnaði ísskápinn og tók út hálfann púrrulauk, rófu, gulrætur, 5 kartöflur, brokkolí og papriku. Skar þetta niður og steikti og setti smá vatn yfir, vænan slurk af einhverju tækarrípeisti og eina dós af kókosmjólk. Setti á lægsta og fór í gönguferð í Elliðárdalinn. Kom heim og borðaði með bestu list. Guðmundi var nokkuð fúll og fannst of mikið af rófum í henni. En hún var notalega bragðmikil og heit fyrir haustupphafið. Svo komst ég að því að tónleikarnir sem ég var á leiðinni á verða í kvöld en ekki í gærkveldi.

La vita e strano

a presto
Giovanna

mánudagur, ágúst 29, 2005

Elliðárdalurinn orðinn svolítið haustlegur. Gul blöð á blómunum. Við Gummi tókum einn sprett. Hann á línuskautum en ég hlaupandi á eftir. Þurfti nú margoft að stoppa og ganga. En samt. Það er spurning hvort maður fari ekki að setja stefnuna á maraþonið? Ég meina, maður fór nú á skíði í fyrra. Sissisiiss.
Allt að skella á og samt svo margt eftir að gera fyrir haustið. Einhvern tímann ætla ég að hætta að gera, bara að vera...

Segi nú bara svona

A presto
Giovanna
Nonna Gio

fimmtudagur, ágúst 25, 2005

Tja góðir hálsar... Ásta Skúladóttir bara farin að blogga. Ég legg ekki meira á ykkur.

Lífið bara sæla hjá Ömmu Jó

a presto

Giovanna

mánudagur, ágúst 22, 2005

Jæja góðir hálsar, aðalfrétt dagsins er að ég fór ekki uppá fæðingardeild í dag.. Ætla að reyna að stilla mig um að vera alltaf ofaní blessuðu barninu. Þau koma sennilega heim litla fjölskyldan á morgun. Fór í Breiðagerðisskóla með Guðmundi Þóri en hann var að hefja nám í 5. bekk. Gaman að sjá hvað börnin hafa stækkað í sumar. Og breyst og þroskast. Hefði náttúrlega átt að fara upp í kirkju, til að hreinsa á skrifborðinu mínu en var auðvitað upptekin við að fara í Pennann og kaupa skólavörur fyrir Gumma minn. Ákvað að byrja að taka til á skrifborðinu á morgun. Draslið hleypur nú ekki frá manni... Jæja...svo týndi ég rifs útí garði og er alveg að fara að setja trommusettið hans Gumma niðrí kjallara svo ég komist inní tónlistarherbergið mitt. Þetta blessaða trommusett tekur allt herbergið, en annars hef ég ákveðið að setja það inní bílskúr um leið og Hi og Skú eru búin að tæma þar. Æfingar á trommur þurfa sitt pláss og helst hljóðeinangrun. Mæli með yndislegri mynd sem ég horfði á í gærkveldi og heitir eftir samnefndi bók Frances Mayes; Under the Tuscan Sun. Mynd sem minnir mann á að njóta augnabliksins og hætta að flýta sér. Ég man þegar ég var búin að vera á Ítalíu í þetta yndislega hálfa ár þegar ég hét því að hætta að stressa mig, fara aldrei aftur útí vinnugeðveikina og muna alltaf eftir því að elda oft ástríðufullar máltíðir fyrir stórfjölskylduna. Því þegar allt kemur til alls þá er aðalatriði að vera en ekki gera. Eða hvað? Ég er nú ekki viss um að Baugsmenn myndu vera sammála mér.

a presto
Nonna Gio

sunnudagur, ágúst 21, 2005

Má ég kynna... Piccolina Skúladóttir
Ég svíf á bleiku skýi. Mátti til að kíkja á myndina á blogginu hans Skúla.
Aðeins að sjá litlu prinsessuna áður en ég fer að syngja í útvarpsmessunni.
Fór í afmæli Önnu Tryggva í gærkveldi, var þá að koma úr heimsókn frá litlu fjölskyldunni á fæðingardeildinni. Fékk að halda á henni og knúsa aðeins...Nokkrar stelpur úr Léttsveitinni mættu til Önnu og við tókum nokkur lög. Það mættu tvær úr 2. sóp en sirka 10 altar og 10 sópranar. Ég söng hátt með 2. sóp og vona að þetta hafi sloppið fyrir afmælishornið..Reyndi svo að halda uppi samræðum við fólk um eitthvað annað en ömmutilfinninguna, en var gjörsamlega annars hugar og fór snemma heim. Búin áðí. En nú er komin nýr dagur og kannski verður maður í lagi í dag. En það er alls ekki víst.

a presto
Amma Jó
Nonna Gio

laugardagur, ágúst 20, 2005

Hún fæddist í nótt, Gullfalleg Skúladóttir, kl. rúmlega fjegur...


A presto

la nonna Giovanna

fimmtudagur, ágúst 18, 2005

Góða nótt góðir hálsar, bara má til að setjast við tölvuna áður en ég fer að sofa. Er að leggja allra síðustu hönd á peysuna og húfuna á ófædda krílið litla. Sem minnir mig á húfu guðs. Að vera í húfu guðs. Kannast hlustendur við að vera í húfu guðs?

a presto

Giovanna

þriðjudagur, ágúst 16, 2005

Jæja elskurnar, eða ætti ég að segja góðir l--hálsar? Kannski einum of gróft. Hef það samt á tilfinningunni að það séu meira stelpurnar sem lesi þetta. Bara rigning og frekar rólegt allt saman. Meira svona setið við eldhúsborðið og kjaftað við fólkið sem lítur inn. Ma og pa. Helgi Steinar. Þórdís og Einar og Alla. Bara gott miðað við veðrið ömurlega. Tjaldið sem drengirnir sváfu í um helgina fær bara að rigna niður. Ætla að reyna að koma mér í göngu í kvellan.

a presto

Giovanna

mánudagur, ágúst 15, 2005

Datt í hug að deila því með ykkur, góðir hálsar að hinn eini sanni Clint Eastwood var með okkur vinkonunum í dekri og spa í gær. Verð að viðurkenna að það hressti svolítið uppá okkar annars fersku anda. Í miklu bjartsýniskasti vonaði ég eina mínútu að hann myndi jafnvel bjóða okkur hlutverk í nýrri valkyrjumynd sem við myndum smellpassa í, en við vorum einar níu saman að baða okkur kæruleysislega í (alltíeinuallofgömlum) sundfötunum í fögrum fossinum skreyttum listaverkum Sigurðar Guðmundssonar þegar stjarnan mætti. Næstu mínúturnar liðu í slow motion og við urðum allt í einu hinar flottustu einhvcrn veginn og fléttuðum okkur fagurlega og í hægum hreyfingum inní leikmyndina. Svo þegar sá frægi var horfinn á brott fórum við svo ínni yndislega gufu sem var með stjörnuhimni og myntulykt og flissuðum einsog unglingar.


a presto

Giovanna

sunnudagur, ágúst 14, 2005

góðu hálsar, er að stelast í fartölvu Hildigunnar og Skúla en þau eru ekki orðin mamma og pabbi og ég þarafleiðandi ekki orðin amma ennþá...en bumban stækkar á blessuðu barninu og bráðum kemur betri tíð.... Skú og Hi fengu íbúðina sína afhenta í gær og ég var núna rétt áðan á Hrísateignum að líta á herlegheitin. Ægilega krúttaraleg íbúð og minnir mig á Fjölnisveginn. Það verður gaman að sjá unga parið koma sér fyrir þarna. Ætli þau flytji ekki svona í byrjun október.... Annars er ég að þjóta,verð að fara í dekur og spa í Laugum.

Athuga hvort það sé ekki hægt að hressa uppá tilvonandi ömmu þarna..

a presto

Giovanna

fimmtudagur, ágúst 11, 2005

Jæja góðir hálsar, allt á uppleið núna. Búin að vera í þrjá daga í Skálholti á námskeiði hinum þýska Ulla Fuhrer, mjög strákslegum,veseneslausum og skemmtilegum náunga, sem gaf mér milljón hugmyndir í kórstarf vetrarins. Og þegar maður fær inspirasjón þá verður allt í einu tilhlökkunarefni af byrja aftur. Og einsog ég var löt í síðustu viku, get ég ekki beðið lengur eftir því að hauststarfið hefjist.


E la vita cosí

a presto tutti frutti

Giovanna

föstudagur, ágúst 05, 2005

nei nei, bara aðeins smá lína núna, góðir hálsar. Búin að syngja í einni för í dag voða sæt lög, ég er þreyttur og svona eitthvað kúttaraleg sveitarómantík. Guðmundur bróðir og pabbi komu og skelltu fyrir mig einni heilli rúðu í brotna gluggann. Drifu þetta upp með þessum líka krafti drengirnir.. Rúðan var búin að vera brotin ansi lengi. Spá í að hafa ítalskt boð á morgun fyrir elsku bræður mína og mágkonur. Gott fyrir sálina að hafa haustfagnað áður en allt heila klabbið byrjar. Ætla líka að sýna þeim stólana sem ég keypti mér. Keypti mér nefnilega dálitla hamingju í Húsgagnahöllinni. Svona tvo forseta-stóla. Eða öllu heldur áramótastóla. Ég held að Vigdís hafi alltaf flutt áramótaræðuna í svona stól. Annars var ég að drífa mig í búðina fyrir lokun og svo fer ég í matarboð til Kötlu í kvöld.

á ég ekki gott.

a presto
Giovanna


Giovanna

miðvikudagur, ágúst 03, 2005

Halló halló! Er einhver þarna úti? Góðir hálsar! Ég er bráðum búin í fríinu sem er eiginlega búið að vera stanzlaust frí nema þá söngurinn allur, ammælissöngur, jarðarfararsöngur og brúðkaupssöngur og svona eitthvað smá tónleikar hér og þar. Mátulega mikið. Ekki of mikið. Ekki of lítið. Alveg mátulegt. Yndislegt. Ég er annars búin að vera hálfdofin eitthvað uppá síðkastið. Aðeins farin að pæla í vetrinum, samt ekki um of. Skoða músík aðeins. Finn eitt og eitt lag..Tek til í einni og einni skúffu, samt ekki um of...Eigum við ekki bara að segja hæfilegt kæruleysi. Geng uppí Elliðárdal. Alltaf jafn gaman, en aldrei eins. Hlusta á upptökur, stundum æðislegar stundum hrikalegar...Ligg í sænskum sakamálasögum sem Helga vinkona lánaði mér. Dásamlegt að liggja í sófanum og lesa...Næstum búin að prjóna peysuna á lilla baddnið. Horfi á Hildigunni mína verða þéttari og þéttari og bráðum léttari. Hlakka til að verða amma. Gummi er búinn að vera góður í ferðalögunum, stundum gormur en oftast góður. Skúli er besti tengdasonurinn. Finnst brauðið mitt gott. Ég vona að ágústmánuður verði rosalega lengi að líða. Nenni ekki að fara að vinna strax. Ekki þessa hefðbundnu vinnu. Langar að vera í garðinum. Fara í berjamó. Skreppa til útlanda. ... eða þannig.

A presto

Giovanna

mánudagur, júlí 04, 2005

Góðan daginn góðir hálsar.. er á 'Isafirði.
A presto

Giovanna

miðvikudagur, júní 29, 2005

Góðan daginn góðir hálsar, ég elska svona próf einsog Hildigunnur er alltaf með. Annars er ég pretty desperate sjálf núna, með allt á hælunum. Elsa og famelía að koma á morgun, Hildigunnur og Skúli að flytja inn og ég að fara að syngja í jarðarför á morgun, og skemmta með 4Klass og á eftir að snúa öllu við og er að fara á saltfiskhátíð á Ísafirði og á eftir að taka til og er svo bara í tölvunni. Mamma mia dio mio ég flippa...


DHlynette
Congratulations! You are Lynette Scavo, the
ex-career woman who traded the boardroom for
boredom, mixed with moments of sheer panic as
the mother of four unmanageable kids.

Which Desperate Housewife are you?
brought to you by

a presto

Giovanna



sunnudagur, júní 26, 2005

Góðan daginn góðir hálsar! Ég er ennþá á ítölskum tíma, þe. vakna snemma á morgnana jafnvel þótt ég hafi verið að spila á balli langt fram á nótt. Það var reyndar dásamlegt brúðkaup, haldið í Viðey, þar sem brúðurin var 56 ára gömul og verður að segja að vissulega gefur þetta manni netta von! Annars er ég er búin að fá mér kaffið, lesa blaðið, og núna get ég aftur sest við tölvuna mína, því að engillinn minn hún María Björk var mætt hér á föstudagseftirmiðdag og fór ekki heim fyrr en hún var búin að reka alla vonda vírusa úr tölvunni og jibbíkóla ég þarf ekki að kaupa mér nýja tölvu einsog ég hélt ég þyrfti að gera. Takk elsku María mín. Nú, nú, svo tekur "fríið" við. Ég á leiðinni vestur á Ísafjörð um næstu helgi en þar er saltfiskhátíð með suðrænni sveiflu. Við Tómas R. Palli T. og Villi Valli ætlum að sulla saman einu suðrænu bandi og syngja og borða saltfiskinn sólþurrkaða í Neðstakaupstað. Svo liggur leiðin til Hólmavíkur en þar er Elsa vinkona mín og Torsten hennar sem verður fimmtugur á þriðjudeginum. Þau eru að gera upp gamalt hús og var ég búin að lofa þeim að hjálpa þeim eftir bestu getu. Þá fer að styttast í Skúlagarðinn en Margrét exfommi verður fimmtug um miðjan júlí og þá skal nú sungið svolítið og skemmt sér. Nema hvað. Svo eru það elsku stóru börnin mín. Þau eru búin að kaupa sér íbúð að Hrísateigi, svo nú ætla þau að flytja aftur inn til mín, til að spara sér smáleigu og hver veit nema að maður fái ömmubarnið bara hérna heima... Gvuð ég er orðin svo spennt. Ekkert smá. Það eina sem við Gummi keyptum á Ítalíu voru barnaföt og svo að sjálfsögðu íþróttabolir frægra fótboltakappa á hann sjálfan, litla prinsinn.

En nú er mál að linni. Ég verð að fara að taka til í höllinni minni svo ég hafi pláss fyrir stóru börnin.

A presto

Giovanna

laugardagur, júní 25, 2005

Góðir hálsar,

ég erkomin sumsé heim í heiðardalinn með slitna skó eftir Ítalíuferðina. Það var algjörlega geggt gaman að koma aftur til Poiano. Og vera orðin vinkona Contessunnar lyfti manni svolítið á svona eitthvað blátt snobbplan sem ég hef aldrei áður verið á... og...Það var svo mikið að gera í ferðinni að ég komst ekki einu sinni í það eina verkefni sem ég ætlaði mér að sinna utan farar- og kórstjórn, þe. að kaupa mér nýja ítalska skó. Svona er lífið í bransanum beibs. En alltaf gott að koma heim aftur, þótt tilhugsunin um legu við sundlaug í viku í viðbót hefði alls ekki verið óbærileg. En sumsé. Loksins komst ég að sundlauginni við Poiano. Loksins lærði ég dansinn við Poiano lagið. Loksins náði ég að komast í morgunmat. Við vorum sumsé ekki alveg eins upptekin þetta árið við sönginn einsog þegar Léttsveitin fór í Ítalíuferðina í fyrravor. Og satt best að segja var allt í lagi að vera án kvikmyndatökuliðs. Reyndar hefði það verið svolítið smart þegar maður var í gala dinnerunum með contessunni,,, en hva...Maður þurfti ekkert að vera búin að setja á sig andlitið áður en maður skellti sér í sólbaðið á morgnana. Gummi gormur eða Gummi góði einsog drengurinn var kallaður í ferðinni skemmti sér líka vel og Gísli píanóleikari var draumur ferðarinnar. Þvílíkur lukkunar pamfíll sem ég er að vera með svona vandræðalausa og skemmtilega og frábæra meðleikara ALLTAF... Je. Og það besta var kórarnir allir, Stúlkna-Kammer- og Drengjakórarnir sungu alltaf einsog englar....

A presto tutti frutti

Giovanna

þriðjudagur, júní 14, 2005

Godir halsar! erum her i godum filing a poiano og stelpurnar eru bunar ad vera dasamlegar. Lentum i otrulegustu aevintyrum sem segir fra a heimasidu kirkjunnar. Signy vinkona er buin ad vera med okkur Gumma og diskotekid vid sundlaugina er ekki leidinlegt.
Drengirnir minir koma svo annad kvold... Legg ekki meira a ykkur.

a presto

Giovanna

mánudagur, júní 06, 2005

Góðir hálsar;

Jibbíkóla, ekki á morgun heldur hinn.... Poiano

a presto

Giovanna
tutta italiana

miðvikudagur, júní 01, 2005

Góðir hálsar, allt að smella. Jibbí.

Vika í Ítalíu og í morgun hélt ég að heimurinn væri að hrynja. Í heila tvo klukkutíma leit útfyrir að það yrðu engir tónleikar í tónleikaferð Stúlkna-og Kammerkórsins, en nú er landið smátt og smátt að rísa og mér sýnist tónleikar séu veruleiki. Ég segi nú bara einsog við segjum í Bústaðakirkju; Guði sé lof!

A presto
Giovanna

föstudagur, maí 27, 2005

Halló allir hálsar!


Ég þarf að hringja milljón símtöl og vesenast og redda en mikið óskaplega á ég erfitt að koma mér að verki. Búin að tala um þetta í marga klukkutíma og ekkert búin að gera. Núna er ég líka búin að skrifa um það og þá er að drífa sig einn tveir og tíu. Dio mio. Annars bara partí og fjör framundan þessa helgi. Sólveig sæta frænka mín útskrifast og partí hjá henni, svo fer ég í sumarbústað til Skúla míns og Hildigunnar (sem brilleraði í söngskólaprófinu og mamman að drepast úr monti) á sunnudaginn. Já sem minnir mig á það að ég þarf að fá frí fyrir Gumma minn á mánudaginn. Í morgun sungum við Léttsveitarkonur í Landakoti, hjá Bimbs og Rósu og það var voða skemmtilegt. Svo er best að segja ekki meira nema athugasemd Hildigunnar var rétt. Miðaldra konur með sérstakan fatastíl...

a presto

Giovanna

fimmtudagur, maí 26, 2005

Góðir hálsar
jess jess ég er tutta italiana...



Your Inner European is Italian!



Passionate and colorful.
You show the world what culture really is.



a presto

Giovanna
Góðan daginn hálsar mínir!

Þessa dagana er ég eitthvað hálf svona þreytt og eftir mig. Samt ekki ennþá búin með vorprógrömmin. En þetta hlýtur að jafna sig. Það gerir það venjulega. Kláraði einkatímana hjá Halldóri í vikunni og hef reyndar ekkert lést, þótt ég hafi styrkst, þannig að það er spurning hvort ég kaupi mér ekki bókina borðaðu þig granna og fari nú enn eina ferðina, þe í 35 sinn að reyna að koma mér í formið rosalega. Alltaf að reyna. Ævisagan mín á að heita, Reyndi allt sitt líf að koma sér í form. Svo er nú það. Já allt svona eitthvað misheppnað hjá mér þessa dagana. Meira að segja þegar ég ætlaði að vera ofsa næs og gefa Hildigunni uppáhaldsdóttur og Skúla mínum elskulega tengdasyni gamla gráa Renaultinn minn þegar ég fékk minn eldrauða Hondu jeppa. Þá gekk nú ekki betur til en að blessuð börnin eru búin að vera stöðugt með gráa gamla í viðgerðum. Vesalings börnin mín. Svo er það tískudaman Jóhanna. Alltaf jafn óheppin þegar maður er gómaður í glansblöð. Hringdi til mín þessi yndislega blaðakona af Vikunni og spurði mig spjörunum úr um fötin mín og smekk. Og ef það er eitthvað sem mér finnst ég léleg í þá er það að fylgjast með tískustraumum og ég hef ekki hundsvit á þessum blessuðu merkjum sem tröllríða tískunni. Jæja samt er maður alltaf jafn veikur fyrir athyglinni, en ég gat ekki annað en brosað þegar að fyrirsögnin var, Konur með sérstakan fatastíl.


Mamma mia!

A presto

Giovanna

miðvikudagur, maí 25, 2005

Góðan daginn góðir hálsar.

Bara að láta vita að það er allt við þetta sama. Löngu komin heim og einsog ég hafi aldrei farið til Ítalíu. Bara verið að syngja þetta lon og don og láta sig dreyma og frá hugmyndir og reyna að festa eitthvað niður á blað. Reyna að taka til, reyna að vinna, reyna að klára og vona að eitthvað takist á endanum. Fer til Ítalíu eftir hálfan mánuð og hlakka geggt til.

ps. bjó til ágætis sultutau með áhrifum frá Stokkeyrarbakka.

800 gr rabarbari
800 gr púðursykur
12 hvítlauksrif ( átti ekki fleiri)
2 cm engifersbiti niðurskorin
10 stk þurrkuð chili
sletta af balsamediki



A presto

Giovanna

sunnudagur, maí 15, 2005

Jaeja, godu halsar!

Hedan fra Norge kemur eitt sunnudagsmorgunblogg. Einn af tessum døgum tegar madur vaknar adeins of snemma, af tvi madur sofnadi allt of seint. I raun var alveg otrulegt ad klara ballid i gaer, ekki sist vegna Omars "Bebe latino" sem var farveikur allan gaerdaginn. Fekk tessa lika pest med haum hita. Drengurinn var med dundrandi hita og klaeddur i peysu undir jakkanum i øllum tessum latino hita tegar vid stigum a svidid kl 9. Los latinos, t.e. vid Tomas R, og Ørjan okkar mjuki norski trommari sem Elisabet var fann her a Dale svaedinu fyrir okkur. Eftir tridja lagid hvislar Omar ad okkur hvort vid klarum ekki eitt lag an hans. Hleypur svo ut og vid tokum einn Orfeo Negro, haegan bolero i lengri versjon... A sidustu tonunum kom drengurinn Bebe inn. Tok gitarinn og spiladi einsog engill eftir tetta. Aldrei betur. Jamm tessi lika yndislegi filingur her i Norege. Bebe floginn heim og vid Kubutrioid, Elisabet, Tomas og eg tjillum i tvo daga.

A presto

Giovanna

fimmtudagur, maí 12, 2005

Góðir hálsar

Í fyrramálið verður lagt af stað í fyrsta gigg hjómsveitarinnar Los latinos og verður það haldið í norsku Dölunum sem eru einhvers staðar norðan við Bergen. Nú er að vita hvort norsku dalirnir heilla okkur Tomma dalamenn, og Ómar hinn unga og efnilega gítarista Los latinos...
En í dag er verið að ganga frá þvotti og pakka niður og í kvellan fer ég að sjá Svik í Borgarleikhúsinu.

a presto

Giovanna

miðvikudagur, maí 11, 2005

Góðir hálsar...

Alltaf að klára eitthvað... Það er bara allsherjar hreingerningaræði þessa dagana. Í morgun sungu leikskólakennarar í Kópavogi í Smáralindinni og voru svo æðislega sætar og krúttaralegar. Svo dreif ég mig bara til tannlæknis og svo var það Halldór hinn frábæri einkaþjálfari sem lætur gamminn geysa og ég er svoleiðs með harðsperrurnar eftir tímana hjá honum... Sisssissisisi!

Og nú er það pörusteikin sem fer í ofninn og ma og pa og hi og skú koma og borða og svo er það Norge á föstudaginn.


A presto

Giovanna

þriðjudagur, maí 10, 2005

Góðan daginn hálsakotin!

Allt einhvern veginn svo léttara þessa dagana. Ekki síst í dag þegar ég er loksins búin að fara til mr. Barðdal með skattmangögnin. Þótt fyrr hefði verið. Undirbý ferð til Noregs á morgun eða hinn. Í dag eru blessuð litlu börnin að fara að syngja og svo ætla ég að elda kjötsúpu með baunum. Men det finder vi ud af senere..

A presto

Giovanna

föstudagur, maí 06, 2005

Halló hálsakotin mín.

Bara í góðum fíling í dag. Tónleikarnir gengu vonum framar og allir ánægðir, nema mamma sem fannst bleiki jakkinn minn ekki vera að gera sig. En. Ég meina maður verður að láta sig hafa það. Ekki er maður fullkominn. Annars léttara líf framundan og vonandi fer ég bráðum að blogga meira.

A presto

Giovanna

þriðjudagur, apríl 19, 2005

Góðan daginn góðir hálsar!

Kvaddi góða konu í dag Guðmundu Guðmundsdóttur alnöfnu móður minnar og mömmu Elsu vinkonu minnar. Það er stundum svo gott að fá að kveðja vini og vinkonur með einu litlu lagi.
Og í gær var farið út að borða í góðra vina hópi á Lækjarbrekku í boði Hemma Gunn. Annars allt í fínu og smá vorfiðringur farinn að gera vart við sig.

a presto
Giovanna

mánudagur, apríl 11, 2005

Góðir hálsar

Mánudagur og lífið gengur sinn gang. Helgin blessaðist, bæði tónleikar og barna-og unglingakórarnir mínir í kirkjunni í gær. Hlutirnar hafa tendens til að bjargast. Og næsta mál. Útgáfa á geisladisk Léttsveitarinnar. Fljóð og funi. Er leggjandi meira á mann. Ég held ekki

a presto

Giovanna

miðvikudagur, apríl 06, 2005

Góðir hálsar!

allt á fullu við undirbúning tónleika á laugardaginn. Albert mætti og tók þessa í morgun.

a presto

Giovanna

þriðjudagur, apríl 05, 2005

Góðan dag góðir hálsar!

Rosalega sem ég er upptekin kona eitthvað. Helgin t.d. var ótrúlega upptekin og líka svona agalega vel heppnuð. Eiginlega frá miðvikudegi voru gigg og djömm stórafmæli og heitir pottar og árshátið Léttsveitarinnar og endaði með sunnudagskvöldi sem gestur í þætti Hemma Gunn;það var lagið. Ég legg ekki meira á ykkur. Ég held að það séu komnar myndir á bloggsíðu Alberts frá því! Og nú framundan strangt aðhald og endurhæfing með hjálp míns unga og efnilega Halldórs í Hreyfingu. Það er mikið verk framundan hjá blessuðum drengnum.
Nema hvað!
Á laugardaginn kemur 9. apríl verðum við Los Divos, þe. ég og Signý Sæm með skemmtun í sal F.Í.H. þar sem við ásamt tríói Bjarna Jónatanssonar píanóleikara leikum og syngjum úrvals Weil og gömul íslensk dægurlög sem enginn annar en Trausti veðurfræðingur hefur hjálpað okkur við að finna. Tónleikarnir verða á óvenjulegum tíma. Hefjast kl. 15.30 og standa yfir í um klukkustund. Með Bjarna í tríóinu eru fiðluleikarinn frá Húsavík Hjörleifur Valsson og Gunnar Hrafnsson bassaleikari sem ég þarf að komast að hvaðan drengurinn sá kemur.

a presto

Giovanna

mánudagur, mars 21, 2005

Halló hálsar og

Til hammara með ammara Bekka.

Einn af þessum dögum þegar ég er á fullu, en finnst ég samt ekki vera að gera neitt sérstakt. Þetta kemur eiginlega ekki heim og saman.

A presto

Giovanna

fimmtudagur, mars 17, 2005

Góðir hálsar, mér er kalt. Eftir hryllilega erfiða viku hjá Halldóri einkaþjálfara, þá settist ég undir teppi með prjónana í morgun. Ég verð að fara að standa mig í ömmustykkinu. Prjóna sokka, prjóna húfu, prjóna peysu og svona. Gummi er að prjóna fléttukarl handa litla/litlu. Mæli með prjónunum í þessu leiðindaveðri. Og í kvöld kveikjum við í arninum.

a presto

Giovanna

þriðjudagur, mars 15, 2005

Jæja góðan daginn góðu hálsarnir mínir, það er nú meira tölvuvesenið hjá mér núna. Ekki bara fékk ég nýja tölvu í kirkjunni heldur kemst ég ekki inná þann meil hjá mér lengur. Og finn ekki gögnin mín sem voru í gömlu tölvunni. Svo ég er hálf-vængbr0tin. Ekki nóg með það heldur er tölvan heima með ótrúlegustu vírusa en ég kemst í þann póst reyndar ef ég er í kirkjunni. María ætlar að redda þessu bráðum...Dio mio! Hringdi til Ítalíu í morgun og talaði við bókasafnsfræðing sem ætlar að redda tónleikum fyrir drengjakórinn minn þar. Já hann heitir það Odddfellow kórinn minn. Drengjakór Íslands. Coro di ragazzi di Islanda. Veit ekki hvort ég á að þora að koma fram þarna úti undir því nafni. Engin undir 25 ára aldri amk...

A presto

Giovanna

mánudagur, mars 07, 2005

kæru hálsar, ég er búin að vera í heila viku á Ítalíu á skíðum með maestro Franco sem er flottur skíðakennari ættaður þarna frá suður Týról, og það ótrúlega er að ég skemmti mér konunglega og er kom óbrotin á leiðarenda og endaði með að renna mér niður hæstu brekkur. Dreymir ennþá hvítar brekkurnar og mig í lyftunum með útsýni yfir til Austurríkis og er í sjöunda himni. Og og og og maturinn og vínið og fólkið og hláturinn og það allra besta að gleyma öllum skyldum og vera í fríi. Ég mæli með Valgardena, maestro Franco í Scoula di Ski og fimm rétta kvöldverði á hverju einasta kvöldi á hótel Savoy.

a presto

Giovanna

miðvikudagur, febrúar 23, 2005

Áður en ég fer á kóræfingu kvöldsins kæru hálsar, ætla ég að elda. Themað er grænt og hvítt. Fyrst set ég græna ólívuolíuna í pottinn og tek þetta græna af púrrunni og sker niður. Steiki svo í púrruna og bæti hvítum basmati hrísgrjónunum við. Set eitt grænt lárviðarlauf. Bæti við vatni og læt suðuna koma upp. Bæti þá við hvítum fiskinum, ýsunni heillin mín, sem ég var búin að skera niður í litla bita og leggja í límónusafann. Slekk undir sjóðandi pottinum. Fer á kóræfingu og borða svo á eftir með bestu lyst. Fiskirisottó nammi namm!

a presto

Giovanna

þriðjudagur, febrúar 22, 2005

Góðu hálsar, var í gær á þessum indælis fundi hjá Vézí beib og var ennþá södd þegar ég vaknaði eftir þessa líka ljúfu gúmmelaðisúkkulaðiköku. Verð að fá uppskriftina. Verð. Það er nefnilega einhver galdur í þessari uppskrift því þegar ég steig á vigtina í morgun, reyndar bæði eftir einkaþjálfun hjá Dóra og sundferð á eftir hafði ég lézzzzt. Já eiginlega svolítið gaman. Þetta er reyndar bara svona eitt kíló, eftir rúmar þrjár vikur en maður er ekki búin að vera að borða neitt minna eða gera eitthvað rosa drastist annað... Da da daraddæ. Skíðahnykillinn raknar upp med det samme og maður tekur lífinu létt

a presto

Giovanna

mánudagur, febrúar 21, 2005

Mamma mia nú fer að styttast í skíðaferðina! Góðu hálsakot, í hvað er ég búin að koma mér? Ég kominn með smá magahnykill. Ekki beint hnút en smá dokku svona...Þetta er einhver skrýtin þerapía sem ég er að koma mér í....en. Sumsé. Fór til Mumma bró í gær og kom heim með risa stóra skíðakennslubók og svakalega flott skíðagleraugu. Það var eiginlega ekki fyrr en að ég var byrjuð að kíkja í bókina að hnykillinn, dokkan eða hnúturinn fór að láta kræla á sér... Það er nefnilega stundum bara þægilegra að vita ekkert hvað maður er að fara útí. Henda sér oní djúpu laugina. En ég herði upp hugann og fer svo í lokatímann á morgun hjá Halldóri einkaþjálfara. Vonandi púrrar sá góði maður mig upp. En talandi um einkaþjálfara er ég hér með fína uppskrift að karríkjúlla.

kjúklingabringur skornar í bita
steiktar með salti og pipar og koriander kryddi
hvítlauksrifum bætt í
karrí líka og mangóchutney
kókosmjólk
Látið dulla á meðan basmati hrísgrjónin eru soðin.

Nammi namm.


a presto

Giovanna

laugardagur, febrúar 19, 2005

Kæru hálsar og hálsakot!

Æi það var svo gaman á Toscu. Ég hafði reyndar ekki séð óperuna í næstum tuttugu ár eða síðan ég sá Kristján syngja Cavaradossi með Opera North í Manchester, þannig að það var algjörlega kominn tími fyrir mig að horfa á hana aftur. Ég man alltaf eftir krítikinni sem KJ. fékk í local blaðinu í Manchester. Það var ein setning. Kristjan Johannsson sang strongly if not unevenly. Og þetta var nú löngu áður en drengurinn sá var farinn að syngja að ráði á Ítalíu.. En ég var að tala um íslensku óperuna. Í litla Gamla bíói. Það er eitthvað svo krúttaralegt og svona sveitó og sætt að vera með stóra óperu í svona litlu húsi. Maður er bókstaflega sjálfur kominn hálfpartinn uppá svið. Kórinn er yfir og allt um kring. Syngur uppá svölum, syngur fyrir aftan mann og í göngunum og söngvararnir koma inn hægra megin og vinstra og að ofan og uppá sviðið. Söngvararnir okkar voru hreint yndislegir. Cavaradossi algjör sjarmör og einhvern veginn einsog hann væri að syngja beint til mín. Scarpia svo innilega djúsí og flottur. Og svona. Tosca vann á og í öðrum þætti elskaði maður hana algjörlega út af lífinu. Ég var reyndar agalega ósátt við búninginn hennar í fyrsta þætti, virkanirnar voru ekki að gera sig þar og það truflaði mig ofboðslega. Ótrúlega flott upphafsatriði. Beggi flottur maður. Já og svo einhvern veginn kórinn æðislegur. Og að sjá útfararstjórann í hlutverki æðsta prests er bara líka svo góður húmor. Auðvitað verðum við að fá stærra hús, en mikið lifandi skelfing er gaman og sveitó fílingur að vera í svona litlu húsi líka! BRAVI!

a presto

Giovanna

föstudagur, febrúar 18, 2005

Kæru hálsar!.
.. allt í steikinni þessa viku. Til dæmis hefur flensan verið að pirra okkur Gumma. Fékk mér harðfisk til að hugga mig og misst næstum heila tönn fyrir vikið, en Siggi tann ætlar að redda mér góðum díl og ná því í svona 200 kall! La vita e bella e sempre una surpresa. Ég treysti mér ekki einu sinni í ítölsku í dag því ég er að spara mig fyrir óperuna í kvöld. Ætla að hlusta á Toscu og athuga hvort Cavaradossi heillar mig... Góðu fréttirnar eru að ég er komin á eldrauðan nýjan bíl. Jezzz. Ble ble

a presto

Giovanna

fimmtudagur, febrúar 10, 2005

Góðir hálsar,

það er naumast hann snjóar! Nú væri ráð að skella sér á skíði! Annars, ekkert spes. Nema jú að ég hlustaði á einkadóttur mína æfa sig í Söngskólanum í morgun og var voðalega stolt af henni. Hún er svo efnileg stúlkan sú. Brava ragazza!

a presto

Giovanna

miðvikudagur, febrúar 09, 2005

Góðir hálsar og hálsakot, sofna með Vilju í eyrunum og vakna með hana í eyrunum á uppáhaldsrásinni minni sem er númer 1. Ég er bara búin að fá mér einn kaffibolla en fæ mér rétt á eftir bolla númer tvö. Í dag er svona vesensdagur. Ég verð ég að fara með bílinn í skoðun en það hefði ég betur gert á síðasta ári í október. Ég bara er ekki alveg inní svona bílamálum og fattaði það alls ekki fyrr og engin í kringum mig heldur. Engin!. Svo fór ég í ástandsskoðun þe. með bílinn í gær en hefði auðvitað átt að fara sjálf í ástandsskoðunina! Nei, það var ekki fyrr en ég var á einhverju bílaumboði að athuga hvers virði gamli grái væri að þetta kom í ljós! Nú,nú meðan ég var með bílinn í þessari skoðun hringdi einhver blaðakona í mig og spurði mig hvernig ég héldi ungdómsljómanum. Ég varð náttúrlega einsog kjáni og varð bara upp með mér og hélt að þetta væri eitthvað persónulegt og fór eitthvað að babbla um einkaþjálfara.... Hefði maður ekki heldur átt að nota tækifærið og mótmæla þessari eilífu æskudýrkun. Er ekki frábært að vera 47, eða 67 eða 87 og bara vera við góða heilsu og svona.

Jæja ég er ennþá í bullinu. Hefði þurft að sofa lengur. Fæ mér nokkra kaffi og segi

a presto

Giovanna

þriðjudagur, febrúar 08, 2005

Jæja kæru hálsar og hálsakot, ekkert leyndó lengur. Hildigunnur og Skúli segja frá leyndóinu á blogginu sínu.... amma mín fór á honum rauð, að hitta einkaþjálfa....

a presto

Giovanna

og munum eftir prjónunum.

mánudagur, febrúar 07, 2005

Spurningin er hvort maður fái sér ekki annan sterkan kaffi með heitri mjólk, góðir hálsar og hálsakot, áður en maður tekst á við mánudaginn. Halldór einkaþjálfari er ekki fyrr en á morgun, þannig að vikan byrjar svona rólega og fallega. Maður fær sér kaffi frameftir í dag og svo kemst maður í Elliðárdalinn á eftir þegar það er orðið bjart. Svo ætla ég að láta ástandsskoða Renault-inn því hann er farinn að falla svolítið saman blessaður bíllinn. Annars bara ágætis dekur og djammhelgi liðin. Gaman með léttunum í Brokey. Svo fór ég í italiano matarboð til Önnu Hinn vinkonu minnar sem býr hér rétt hjá. Fylltist húsið undir lok af syngjandi drukknum Fóstbræðrum sem voru að koma úr þorrablóti, en það var nú farið að halla undan fæti hjá mörgun áður en yfir lauk. Signý var afmælisbarn gærdagsins og kom maður ekki að tómum kofa hjá henni. Bollur og kökur og borið svignaði. Nammi namm.

a presto

Giovanna


föstudagur, febrúar 04, 2005

Góðir hálsar! Tímarnir líða og breytast. Ég var á handboltamóti ( seinni part föstudags!) og var heitt í hamsi og kallaði: "Áfram Víkingur! Koma svo! Já. Fara í vörnina!" Allt í einu áttaði ég mig á því að það var bara ég sem var svona æst og rauð og hætti þá svona smám saman og fór svo bara og fékk mér kaffi og fór að tala við einhverja pabba sem voru þarna og reyndi svo bara að vera róleg og horfa svona með öðru auganu og ekkert að missa mig í leikinn!

Mamma mia! Þetta var sumsé þriðji handboltaleikurinn sem ég mæti á.

A presto

Giovanna

fimmtudagur, febrúar 03, 2005

Jæja góðu hálsar!

Ég er að taka niður jólaseríurnar. Ákvað að fyrst febrúar væri kominn þá þýddi ekki lengur að skýla sig á bakvið jólaseríurnar. Þetta er nú svolítið mikið mál fyrir einstæða konu að taka svona niður. Æi já það eru einmitt þessar stundir sem maður vildi mikið gefa fyrir að eiga mann sem hjálpaði til við heimilsstörfin. Miðaldra konur geta líka látið sig dreyma...

a presto

Giovanna

miðvikudagur, febrúar 02, 2005

Góðir hálsar, fór á hárgreiðslustofuna Björk í morgun til að hitta Hildi hár og hún tók örugglega eitt kíló af hári af mér. Faldi þessi þrjú gráu og mér finnst ég ofsalega sjænuð og fín. Svo er bara allt á milljón skilljón hér og kominn febrúar og ég reyni að draga djúpt andann. Dio mio! Ég er sennilega enn búin að taka alltof mikið að mér. Það klikkar þá bara eitthvað.E la vita cosí. En Dóri klikkar ekki og ég fer á eftir til hans og tek á honum stóra mínum.

je beibs

a presto

Giovanna

þriðjudagur, febrúar 01, 2005

Elskulegu hálsar og hálsakot!

Gat nú engu lyft í dag sökum ofreynslu í síðustu viku, en reyndi þeim mun meira á leggina. Nú á að ná að standa á skíðum í rosalega þykkum og stórum skíðaskóm í lok febrúar. Dóri tók brosandi á móti mér og skammaði mig ekkert þótt ég gæti varla náð upp léttum lóðum og púrraði mig upp með því að segja að ég væri amk. sterkur karakter þótt ég væri ekki sterk. Skiljiði. Þetta er alveg draumur. Las í blaði í morgun að það væru margar miðaldra konur að hitta einkaþjálfara á morgana, til að hressa sig við. Ég mæli með Halldóri. Hann er frábær!

a presto

Giovanna

mánudagur, janúar 31, 2005

góðan daginn hálsar og hálsakot! Fyrirgefiði bloggleysið. Það er bara útafþví að ég hef átt svo erfitt með að hreyfa hendurnar uppá síðkastið. Eftir þriggja tíma púl hjá Halldóri ( og svo er hann frá Vestmannaeyjum!) þá hef ég þurft að hlífa höndunum, eða kannski bara ekki getað lyft þeim. Við ( Dóri ) erum nefnilega búin að uppgötva nýja vöðva sem ekki hafa verið notaðir í 30 ár, þe. frá því að Dóri djúsí var tveggja ára. ( segi og skrifa 2.ára) Nei, kæru lesendur, það er ekki leiðinlegt að lifa þessa dagana. Á morgun hitti ég Dóra og við munum halda áfram að lyfta og svo er ekki verra að í lok hvers tíma förum við í afar áhrifaríkar teygjur.

a presto

Giovanna

þriðjudagur, janúar 25, 2005

jezz jezz jezz...


You Are 22 Years Old
22

Under 12: You are a kid at heart. You still have an optimistic life view - and you look at the world with awe.
13-19: You are a teenager at heart. You question authority and are still trying to find your place in this world.
20-29: You are a twentysomething at heart. You feel excited about what's to come... love, work, and new experiences.
30-39: You are a thirtysomething at heart. You've had a taste of success and true love, but you want more!
40+: You are a mature adult. You've been through most of the ups and downs of life already. Now you get to sit back and relax.



a presto

Giovanna

mánudagur, janúar 24, 2005

Hálsakotin mín, hann heitir víst Halldór, þessi raddfagri einkaþjálfari sem ég hitti í fyrsta sinn á morgun. Sit og læt mig dreyma í nokkrar mínútur um vel vaxinn sólbrúnan og vöðvastæltan ungan mann en svo ranka ég við mér. Nei vonandi er hann frekar eldri maður og þarf ekkert að vera neitt vel vaxinn þannig bara maður sem hefur sans fyrir miðaldra mjúkum konum...

a presto

Giovanna

fimmtudagur, janúar 20, 2005

Góðir hálsar, haldið niðrí ykkur andanum. Ég er búin að kaupa mér einkaþjálfara!

Meira seinna

a presto

Giovanna

miðvikudagur, janúar 19, 2005

Það er þetta með líkamsræktina og Laugarnar kæru hálsar og hálskot... er þetta ekki fyrir einhverjar aðrar týpur en mig. Ég er nú eiginlega meira svona heimatýpa. Já svona týpa sem fer þá frekar að baka brauð heldur en að stinga sér í einhverja líkamsrækt. Það er náttúrlega ákveðin hreyfing að baka. Og svona. Æi já.. Annars tíminn flýgur og ekkert spes að gerast. Nema þetta sama. Alltaf verið að syngja og svona.

a presto

Giovanna

sunnudagur, janúar 16, 2005

Góðir hálsar,

Dio mio, enn ein helgin flogin. Giggin búin og jólatréð farið. Seríurnar fá að hanga aðeins lengur amk. framyfir öll barnaafmælin sem framundan eru. Bara vel og vonandi eru stóru börnin komin til Noregs núna. Stóra spurningin er hvort maður nái að setja í uppþvottavélina fyrir nóttina.

a presto

Giovanna

fimmtudagur, janúar 13, 2005

Jæja hálsar góðir, á maður kannski að fara að taka niður jólatréð? Það var óskaplega fallegt þetta Léttsveitarjólatré en farið að láta á sjá. Stefni að því að taka það niður fyrir helgi. Svo er þetta með Laugarnar og línurnar. Að ná því líka fyrir helgi væri kraftaverk.

a presto

Giovanna

mánudagur, janúar 10, 2005

Til hammara með ammara elsku Halli minn frændi góður...
Góðu hálsar,

þvílíkur morgunn! Ætlaði sko svo sannarlega að fara í Laugar, líkamsrækt og hefja nýja lífið sem ég lofaði sjálfri mér í gærkveldi, en skreið óvart uppí rúm aftur þegar ég var búin að keyra litla prinsinn í skólann og tók moggann og fréttablaðið með mér. Klukkan hálf ellefu þegar ég var margsinnis búin að segja við sjálfa mig. Hana! Af stað. Drífa sig. Þá loksins tókst mér að komast á lappir og bara uppí Dal. Bara vel. Svo er bara kennslan byrjuð. U la Madonna, og ég sem á eftir að skipuleggja líf mitt.

A presto

Giovanna

laugardagur, janúar 08, 2005

Og góðir hálsar,

Elliðárdalurinn náði mér upp í dag. Jafnast ekkert á við dalinn. Tilbúin með mohito handa blúsbræðrunum. Partí í kvöld og börnin flytja rest á morgun. Allt í lagi með það. Gummi er búinn að panta stóra herbergið. E la vita.

a presto

Giovanna

fimmtudagur, janúar 06, 2005

og góðir hálsar... besta stúlkubarn ársins 2004 er skördí sjálf og besta sveinbarn ársins 2004 er gummigurka@hotmail.com. Fast á eftir kemur hann Skúli minn

Takk fyrir
La mamma Giovanna


Jæja góðu hálsar, gleðilegt árið...og nú er að reyna að feta sig áfram. Kalt og drasl í dag. Reyni að skella í vélar og skúra og bóna svo ég ég geti farið að skipuleggja. Á meðan ég reyni að ná upp dampi þá bollalegg ég bara í kaffinu endalausa...

a presto Giovanna